CIC nanoGUNE-n izan da IKUR komunitatea
IKUR komunitateak bi lan-jardunaldi egin ditu nanoGUNE-n, uztailaren 15ean eta 17an, helburu hauekin: ezagutza eta lortutako aurrerapenak partekatzea eta IKUR-Quantum Technologies eta IKUR-HPC&AI proiektuen arteko lankidetza sendotzea. Eusko Jaurlaritzako Zientzia, Unibertsitate eta Berrikuntza Saileko ordezkariak izan dira jardunaldietan; hain zuzen, Adolfo Morais Zientzia eta Berrikuntzako sailburuordea, Amaia Esquisabel Politika Zientifikoko zuzendaria eta Maialen Agirre Berrikuntzako zuzendaria.
Ekitaldian, proiektuetan lortutakoen berri eman dute parte-hartzaileek; zehazki, 2026ko abenduaren 31 bitarteko exekuzio-aldia dute proiektuek. Jardunaldian aukera izan da esperientziak trukatzeko, garatzen ari diren ikerketak ikusgai egiteko eta lankidetza-aukera berriak eskaintzeko lantaldeen artean.
Proiektuen jarraipena egiteko puntua izateaz gainera, ekimenak erakutsi du zer konpromiso duen IKUR komunitateak lankidetza zientifikoarekin, ikerketa-bikaintasunarekin eta Euskadirentzat estrategikoak diren esparruetan sinergiak sortzearekin, bai eta teknologia kuantikoekin eta prestazio handiko konputazioarekin eta adimen artifizialarekin ere.
Saioak nabarmendu egin du Euskadiko I+G+Bko ekosistemako ikerketa-zentro, unibertsitate eta eragileen arteko lan kolaboratiboaren balioa, eta potentzial zientifiko eta teknologiko handiko eremuetan ezagutzaren garapena eta ikerketaren inpaktua bizkortzen lagundu du.
IKUR estrategia
Eusko Jaurlaritzako Zientzia, Unibertsitate eta Berrikuntza Sailaren ekimen bat da IKUR 2030 Estrategia, helburu duena Euskadiren etorkizunerako estrategikotzat jotzen dituen lau eremu zientifikoak garatzea: neurobiozientziak, teknologia kuantikoak, neutrionika eta prestazio handiko superkonputazioa eta adimen artifiziala (HPC&IA). Eusko Jaurlaritzak, eremu horiek sustatuz, Euskadik zientziaren alorrean nazioarteko erreferente gisa duen posizionamendua indartu nahi du, bai eta inpaktu ekonomiko eta soziala duen bikaintasunezko oinarrizko zientzia garatu ere.